Rom 14 | BEF | STEP | To bona'i moneuba Hu'mamofitoga keheli bati mehina olenogo be tigite le'malo. Ai ekesa keheli ule'ale mehu'ehinogomo ana mono kamu'i kenasabo mebise lenali folagahatinigu ana bomo le'mo fulu hite le'mo malalo.

Romans 14

Lenali bonatinimofihi kaga loko mehilo

1 To bona'i moneuba Hu'mamofitoga keheli bati mehina olenogo be tigite le'malo. Ai ekesa keheli ule'ale mehu'ehinogomo ana mono kamu'i kenasabo mebise lenali folagahatinigu ana bomo le'mo fulu hite le'mo malalo. 2 To bona'i moneuba komopa'a Hu'mamofitoga fulu huto nohinogo nose'na fato fato'i asaga'i bati huto nolata hilibe. To fato bona'i komopa'a Hu'mamofitoga keheli amuya memolo'ehina bouba guya'asigo nolata hilibe. 3 To lenali fato fato nose'namo nenanamagita ya'ma nose'na mone'a mo nosina bomofihi ka meemekilo. Ai'a ekesa keheli'ehinamofihi kaga loko mehilo. To ana huto lenali mone nose'na mo nesina guya'asigo nenanamagita ya'ma nose'na yege yege'i nonana bomofihi hapa'amu ka meemekilo. To hena'mube? Hu'mau ana bomofihi ale'mo'ehinagihe. 4 Ana bona'i Hu'mamofihi lili'nalo bona'a nohibe. Lenalitini kele kele bona'i menohibe. Ai'a lili'na afo'afu Hu'ma, ai hapa'amu kehelito bati hinogofi bati mehinogofi ai'a kehelilina'mu yabe. Lenali foyatini meni'ibe. Hu'mau he'moto le'mo amuya mololenogo ana bomofihi hapa'a bati huto huto hilina'mu yabe.

5 To bo moneuba mone yupahi hofa talina kana ni'ibe luto to ya'ma yupahi lulata nohibe. To mone bouba asaga yupahi moneko babeyafa ni'ibe luto lulata nohibe. Etegekesa kehelise'na ule'ale hite etali foya'atiti yabe. Lenali ana hite ya kehelilo. 6 To mone yupahi napa ni'ibe lulata bouba Hu'mamofihi gi'a liyafa huse'namu'i ana yupapogu fuli minalibe. To asaga nose'na nalata bouba ana huto Hu'mamofihi gi'a liyafa huse'namu'i kaba huto nominabe. To ai ana nose'namo Hu'mamofitoga gepohi luto bati huto yabe luto lu emito nonabe. To bo moneuba fato nose'na mo sito guya'asigo nalina ai ana huto Hu'mamofihi gi'a liyafa huto bati huto yabe lu emito nonabe. 7 To lali ma melugu nohuto fililupi minalupi ya'ma kaba huse'na laliti meni'ibe. Fililenogo minolenogo yamofihi nasana'mu lalitisigo meni'inagi Sipi Botiuba ai'a kaba huse'na'a ni'inagihe. Lali lubu hiti minoto nohuta ya'ma Sipi Bomofihi agoya hu emilata nohune. 8 To fililata nohuta ya'ma Sipi Bomofihi agoya hu emilata nohune. Yana'mu ya'ma lubu hiti minoto lito hiluta to fililuta ya'ma Sipi Bomofihi nasana lolo hilune'mu hune. 9 Ya nohina'mu Kilisitou filito aku fili'ehinagati ho ti'ehinagi yatai fili'ahanamagihi lubu hiti mino lito nohutamofihi ai kaba bo nohinagihe. 10 Ya hina'mu lenali henabe lite bonatinimofihi ka emekite ka'a loko nehabe? To henabe lite le'mo laba nehabe? Hu'mau kefa hisalo minoto kaga loko huse yupahi lali asaga'i bu'alo ho tito minolenogo lali kumu ka foya liloto kaga loko hilina'mu yabe. 11 Ya hilina'mu mono bukugu ma lite fayahi ge'ahana:

Nani nubu hiti
minoba minoba nohuna bo nohube.
Silaga boana'magi yege yege'na nogobisalo
enalahupa nohi fite minelete
to enabagaguti ma lilabe:
Hu'mao, kibina boti nohane, lilabe,
Sipi Bouba ya luto nolina yabe.

12 Ya hina'mu lali asaga'i Hu'mamofihi bulo foyati li'ohuta'mu minenogo ai kagati loko hilibe.

Bonatini enele'mo sibina mehilo

13 Yana'mu lenali bonatinimagihi kaga'ani loko hise enifisa ilatana li he'milo. To lenali bonatinimu'i lenegekesa kehelite enele'mo sibina mehilune lite, to foipa kapogu enele'moto bu laligi lolo huse'natinimofihi kaba hu bati hilo. 14 To nani Sipi Boti, Yesu aitoga hepi'ohugo nipa'nigu ya'ma keheliya i'ohuna ma ni'ibe. Asaga nose'na ai'a keya'i hu'ehina'a meni'ina'mu asaga'i gulu gulu hu'ehina'a nalutagi mo sise'na meni'inaya. Aku bo moneuba ekesa kehelito mone nose'na keya'i hu'ehina'mu yabe luto ai'a komopa'agu kehelito gulu gulu mehu'ehina nose'na huto hinogo menalibe. 15 To lenali mone nose'na nalana'mu fato bouba bu goloto ana nose'namu komopa'a sibina hinogomo henabe lite ana nose'na nalabe? Yalo lenali ana bo'mu leniginaga mefise bati mehu'ehina. Ya'ma bo'mu Kilisitou afili'ehinagi komopa'a amuya memolo'ehina bomofihi le'mo sibina hu laligi ana nose'na menalo. 16 Ana huto lenali mone nasana'mu bati huto ni'ibe lite keheli'ahanamoya aku bona'i moneuba ekesa kehelito bati mehina nasana yabe luto kehelinogo lenali anana lolo hise'namu li he'milo. Ana bouba lolo hise'na komopa'auba sibina hinogomo ya'ma bati mehilina'mu yabe. Li he'milo. 17 Hu'mamofihi kapogu minaluta hapa'a ma ni'ifihe? Nose'na hiti nagami'i hiti nalutanamofihi nasanabe? O'e, ya huto meni'ibe. Hu'mamofihi Sikalafu'uba komopatigu lamana huse'na hiti to mino fulu huse'na hiti to legelo bise'na ya'ma lolo nohina ya'ma Hu'mamofihi kapo ni'ibe. 18 To lenali Kilisitohi ka'a kehelite agoya hu emilenogo Hu'mau lenali kumu fokehi lilata nohibe. Ya nohigo bona'magi ana hite ma'naka lite ananamu'i enofokehi lilabe.

19 Ya hu'ehina'mu lenali bonaloga fulu huse'namofihi nasana'mu le'mo saga hino. Lenali ya hite bonatini enehe'mago ai le'mo amuya melenogo ai le'mo amuya melenogo hite bati hite minalabe. 20 Lenali nose'na nalanana'mu Hu'mau bona'i enele'mo'ehinamagihi li sibina mehi epalalo. Asaga nose'na lali bati huto nolata nohuta, aku lenali mone nose'na nalana'mu bona'uba keya'i hu'ehinana ni'ibe luto komopa'agu keta nohinogomo yana nose'na menete mo silo. 21 Lenali fato fato nose'namo yagafi, bai nagami'ifi asaga'na nalanamofihi bonatini bu goloto komopa'agu li sibina hinogomo lenali ya'ma nose'na he'mite menalo. 22 Lenali ya'ma ni'ina'mu lenipagu kehelite Hu'mau bati huto yabe linogomo lenali kehelite mine lite bite lu hokolo mehilo. Bo moneuba nose'na mone noloto ekesa kehelito bati huto nalube luto ligo komopa'agu keta mehinogomo ana bo gepohi lilata nohibe. 23 Aku ana nose'na nolago ekesa loe lae higo to komopa'agu keta hinogomo Hu'mau fisa ito ka emekilibe. Hena'mube? Ai keheli'ehinaloti ule'ale mehuse komopa'a keta higo nalina'mu yabe. To lenali ana hite asaga keheli'ahanaloti ule'ale mehuse komopatinigu keta hilina'mu foipanatini huto hilibe.